(Ռատիօ Վատիկան) Չորեքշաբթի 15 յուլիս 2015-ին, Ֆրանչիսկոս Պապ, Լատին Ամերիկա կատարած առաքելական ճամբորդութենէն ետք, հրատարակեց իր առաջին թուիթը, որուն մէջ դարձեալ շեշտը դրաւ աշխարհի մէջ սովէն եւ անօթութենէն տառապողներուն վրայ, հաստատելով թէ հարկաւոր է փոխել մեր մտայնութիւնը ու դադրիլ մտածելէ թէ մեր ներգործութիւնները ազդեցութիւն չունին անոնց վրայ որոնք սովէն եւ անօթութենէն կը տառապին։
''Ժամն է փոխելու մտայնութիւնը ու դադրինք մտածելու թէ մեր ներգործութիւնները ազդեցութիւն չունին անօթութենէն տառապողներուն վրայ'' գրեց Ֆրանչիսկոս Պապը իր հրատարակած թուիթին մէջ։
Յայտնենք թէ Նորին Սրբութիւնը Յուլիս ամսուայ ընթացքին դադրեցուցած է իր հանրային ու պաշտօնական գործունէութիւնները, որոնց շարքին նաեւ` չորեքշաբթի օրուայ հրապարակային ունկնդրութիւնները, որոնք կը վերսկսին միայն օգոստոս ամսուայ ընթացքին։
Նշենք նաեւ թէ, վերոյիշեալ առկախուած գործունէութիւններէն դուրս կը մնայ կիրակի օրուայ Մարեմեան Աղօթքը, որ կը շարունակուի տեղի ունենալ, Սուրբ Պետրոսի հրապարակի վրայ ամէն Կիրակի կէսօրին։
Նշելու ենք նաեւ թէ Ֆրանչիսկոս Պապը` Յուլիս ամսուայ ընթացքին կը շարունակէ մնալ Վատիկանի մէջ, ընդհատելով իր նախորդներուն սովորութիւնը` Քասթել Կանտոլֆոյի քահանայապետական ամարանոց փոխադրուելով ուր, անցեալ օրերուն` 15 օրուայ համար փոխադրուած էր Պենետիկտոս ԺԶ վաստակաւոր Քահանայապետը, որ երեքշաբթի 14 յուլիսի ուշ առաւօտուն վերադարձաւ Վատիկան, շնորհակալութեան գիր մը ուղղելով տեղւոյն քաղաքապետ` տիկին Միլվիա Մոնաքեզիին, վայելած ''լուր ու հանգստաւէտ հիւրընկալութեան համար’’։
All the contents on this site are copyrighted ©. |